遲兩年買樓平啲 錯覺﹗與其呆等 直接講價更實際

讀者來信

本人曾經有過物業，可惜在2017年，見樓價升得高，於是就把單位賣了，原本計劃是先租地方住一、兩年，待樓價跌的時候再買回來，賺取差價，可惜事與願違，之後樓價雖有起起伏伏，但就未返回當年自己賣樓的價錢，所以一直上唔番車，這就是落錯車吧。

今年樓價終於大幅回落，距離當年賣樓的價錢不遠了，我想買番層樓，但家人很反對，話現在只是跌市開始，未來又處加息週期，再等多兩年好啲，樓價有機會跌兩成甚至更多。經過上次的教訓，真的猶豫，遲兩年買係咪真係會平啲呢？是否應該等多兩年？
by Danny

覆讀者來信

很多朋友都有這個疑問，筆者的答案是…點解要等呢？
最近樓市成交冰封，其中一個原因想買樓的人的在…等！

舉例說，物業A市值450萬，高峰期搶到500萬…
現在回落至450萬，其實冇乜點平過，只係回到正常水平而已。

假設跌市持續，兩年後物業A樓價可能跌到400萬，比高峰期平兩成；甚至可能跌到350萬，比高峰時平三成。所以就形成了「遲買會更平」的信念。

跌市時 總覺會跌更多

最差情況是，任何時候都覺樓價會更平。

跌市的時候，買家信心脆弱，跌到450萬，就會想…會唔會跌到400萬呢？跌到400萬，就會想…會唔會跌到350萬呢？就算真係跌到350萬，就會想會唔會跌到300萬…甚至250萬呢？

無論跌幾多，他們都會想，會唔會跌得更低，都係唔敢買。這就是為甚麼2008年、2003年的時候，樓價那麼便宜，仍然不敢買的主要原因之一。

唔好介意筆者講得絕，心態不改，無論樓價高低，呢世都買唔到！

新樓或者要等，然而在二手市場，等甚麼？何不直接講價？
以上述的例子為例，你先要問自己，覺得這個單位，兩年後會跌到幾多？例如你估計兩年後大約跌到350萬。一般人的思維是等兩年，等兩年，兩年後它會自自然然地跌到350萬，然後就買了它，從此過著幸福快樂的生活。

沒有人能捉到底部

問題是…如果你估錯呢？如果未跌到350萬，例如跌到380萬、370萬就已經反彈，重上400萬以上呢？豈不是錯過了一個絕佳的上車機會？

投資者通常都會主動出擊，趁市況淡靜，直接就跟業主講價。
例如你估計兩年後會跌到350萬，直接去還這個價，如果真係買到，跟預期兩年後的價沒分別，還等甚麼？

當然世事未必會咁完美，最終可能370萬、380萬成交，最少你真係以平價買到，最少唔使忐忑不安地等兩年，最少呢兩年唔使交租，何樂而不為呢？沒有人知道幾時先係真正見底，低位通常是事後才知道。