地產代理獨家放盤 好唔好？

很多人識買樓，但賣樓就未必識。其中一個問題，不知大家有沒有考究，就是地產代理叫你獨家放盤，你認為是好事？還是壞事？

早前就有一位同學問我，他說與父母同住，除了自住單位外，母親早年還買入了兩個單位收租，都是30至40年的舊樓，市價大約400萬左右。眼見最近市況轉弱，一家商量過想先放售其中一間，套現後等機會再買。有代理游說他們放獨家給他，說效果更好，他自己也拿不定主意，於是前來請教我。

淡市並非出貨時機

首先，想跟這位同學說的是，現時樓市氣氛，是入貨好機會，但不是出貨理想時機。

小市民很奇怪，市旺的時候，業主反價又反價，買家都會不斷追價入市，明知唔抵買都追！市靜的時候，業主劈價又劈價，買家都會縮沙，所謂剛性需求會忽然消失，明知又平又抵都唔買。

以現時的情況要出貨唔容易，想出靚價更要有經驗、有技巧、有人脈網絡，可以唔賣咪唔好賣住囉，出年個市好番先再賣。

不宜獨家放盤

第二點要說，如果同學真係想現在就放盤，根據筆者過往經驗，想出貨應該放多幾間，唔係放獨家。

一般而言，獨家代理合約期為三個月。意思是在這三個月內，你只可以透過這間代理行放售，如果你透過其他代理行出售，同樣要付1%佣金予該代理。

代理游說你放獨家的時候，總會有很多漂亮的理由，例如「你都見到我哋每個星期有喺報紙落廣告架啦，俾我哋做獨家，我哋會幫你落廣告推廣，嗰度都洗唔少錢架！」…又例如「成條街咁多代理，逐間放你唔煩咩，俾我哋做獨家咪一樣，我哋會放晒俾行家！」

嘉湖低價成交醜聞

大家記不記得早幾年爆出一單被朋友解讀為醜聞的新聞…

話說嘉湖山莊做出一宗驚人的劈價，中銀及匯豐估價分別是340萬元及374萬元，但該盤最終以260萬元成交，低市價近三成，買家正是放盤的代理行同事。

據報導，代理行回應稱業主八月初委託該行獨家放售，但是放盤幾個月仍然乏人問津，於是業主主動減價促成交易。

放幾家 可以比較

以上述的個案為例，其實只要代理行同事有向業主申報利益，買家是自己，而業主又同意的話，原則上就不涉及不公平交易。作為業主最想知道的是，係咪真係冇其他更好的出價？

現時市況淡靜，可能真係冇人問，筆者不敢質疑該代理的陳述，問題係呢間代理行冇唔代表其他代理行冇，例如佢還你260萬元，你可以話俾兩日時間你同屋企人商量，趁機會問其他代理，有買家出價，你哋有冇客要？ 啱就280萬元俾你，冇我就簽架啦！如果真係冇，心甘命抵。

筍價代理自己要 懶得幫你推

唔好覺得好唔公平，代理自己買樓其實是常識吧！

筆者認識很多地膽代理，閒閒地十層、八層樓楂手，幾千萬身家，你估賺佣金真係賺到咁多咩，最主要係自己收盤，有超級筍盤梗係美女廚房，食咗先講，食唔晒，再俾相熟炒家、投資者，問心嗰句…好熟咩？有筍盤點解要益你？作為業主一定要懂得保障自己，除非你跟這個代理非常信任，例如筆者有位同事，她的母親就是某區的地膽代理，否則應該多用幾個代理。