樓市創新高3大問題 現在追買定等下次？

最近收到有網友提問：「Anthony Sir，之前疫情的時候見你在專欄及Live叫人要把握機會買樓，我和家人都唔信，覺得經濟唔好，冇咁快升，估唔到不到一年已經創新高了，不得不服。想請教如果我之前冇買，而家仲可以追入嗎？還是應該等下次跌市呢？」

這亦是最近一個月，最多人問的問題。
答案就是，現在還未遲！很多樓仍然有不俗的水位~~

問題一：而家買好？定等下次？

冇得等啦！上兩次的跌浪，包括2015年底及2018年底，跌市只是維持了半年左右，累積的購買力不算多，都已經帶領樓價指數衝上188.64及190.48的新高。今次的購買力累積了兩年！由2019年社運到2020年的疫情；再加上世界各國為了救市，分別推出量化寬鬆政策，資金泛濫，睇最近Hibor的走勢就知道；再加上林鄭Plan出台，令大量中原指數中的成份屋苑，都跌入高成數按保門檻；再加上未來幾年供應斷層；除非有突發性事故，否則都可以幾肯定，今次破頂後，仍會有一段頗大的升幅！

等？就算俾你捉到，相信都會比今天貴！看數據就知，2015年下跌，2016年中反彈，直到2018年中見頂，即使樓價回落了，仍遠遠不到2016的水平！相信今次亦不例外。

問題二：現在還可以買到有水位的樓嗎？

肯定可以！今次的反浪只是剛剛開始而已！

如果你之前一直都有睇樓，你會發現反彈至今，主要升幅都是集中在林鄭Plan，即600~1000萬的單位，可能因為以前冇得買，而家打開大門，自然埋嚟揀埋嚟搶！至於沒有直接受惠政策的單位雖然都有升，但唔多。表面睇業主叫價都唔平，但看成交價，升幅未算明顯，即是說…議價空間甚大！

例如一些熱門的上車屋苑，距離高位仍有近一成差距，又例如一些位置極靚，市區的單幢樓及小屋苑等，甚至有近兩成水位！到600~1000萬的單位破頂又破頂，還有新樓高開又高開，醒目的資金自然追落後，這些單位亦必然水漲船高，只要多落區睇樓，大膽還價，肯定有意外收獲！

問題三：那些小區有水位呢？

港九新界各區都有這種情況，港島區貴為龍頭回升幅度比較大，選擇比較少，九龍區及新界區選擇較多！例如最近比較多新樓盤的旺角區，只要你唔好淨係跟新手代理去睇新樓，比較一下新樓旁邊的二手樓，就知道水位有多大！規模較大的新盤One Soho後期呎價賣到逾26,000，規模較細的利晴灣23、千望後期呎價逾22,000及24,000，就連青衣位置甚偏的薈藍都逾20,000，相反旺角區內一些著名的半新樓，例如新世界的Sky Park、信和的奧柏御峯、新地的形品星寓等，論位置、規模、質素、會所等，有過之而無不及，而且現樓即買即住，呎價反而不到20,000！只是因為很多代理都只會帶客睇新樓，沒有帶你睇二手而已。