住鐵路沿線 唔一定方便 鐵路盤冇得輸 更加超錯﹗

近年多個具備「鐵路概念」的新界區新盤熱賣，銷情遠比市區盤熾熱，點解？係咪住遠啲，會平啲？又唔係喎！睇價錢其實同市區差唔多，部份新盤加價加推後，價錢甚至比市區的半新盤更貴！不少買樓經驗豐富的前輩，跌到一地眼鏡碎，買樓不是要講Location的嗎？為甚麼現在的人買樓亂來的？

「鐵路盤，好方便，冇得輸！」

代理推銷新界區鐵路沿線新盤時都會這樣說，很多新手買家都信以為真！東鐵及西鐵沿線，例如火炭、錦上路的新盤固然熱賣，即使要轉輕鐵的新盤，例如洪水橋、屯門南的一樣熱搶，不少呎價更超過兩萬，比很多市區半新盤還要高。

住鐵路沿線 係咪真係方便？

其實是方便你搭車，不是真正的方便！確實，幾分鐘就行到去港鐵站，搭車而已。如果你在市區返工，例如中環、銅鑼灣等傳統CBD，隨時迫車迫成個鐘，一來一回就是兩個鐘。

還有，在上班下班繁忙時間，要排隊逼上車，要等幾班車先上到車。上到車仲要好多時都冇位坐，即是要硬企兩個鐘！企响度瞌眼瞓，仲要成個車廂逼滿人，好似沙甸魚咁！我想大家都試過吧。呢啲經歷，大家又係咪咁Enjoy呢？

其實有鐵路直達，都唔代表方便。我去佛山都是鐵路直達！

有次跟Giano大師返大陸睇樓，相約在佛山祖廟某商場吃晚飯，我由西九龍出發，一小時到廣州南，再轉廣佛線，坐多一小時就到了，鐵路直達，落雨都唔驚。如果鐵路直達等於方便，咁不如索性佛山！

考慮一： 返工實際所需時間

是否方便，不單是考慮有冇港鐵直達，更重要出入所用的時間。

我自己的標準是半小時生活圈，由踏出家門起計，半小時內可以返到公司就算是方便。很多市區盤都可以做到，尤其是屯馬線及東鐵線過海段通車後，能滿足一般人半小時生活圈的選擇就更多，甚至行路返工都仲得。

例如筆者最新一條Youtube片介紹市區細價半新盤收租王，其中一個大角咀的半新盤，一房單位才6百萬多，總價仲平過新界新盤。租客在奧運匯豐大樓上班，走路才3分半鐘，相比迫港鐵一兩個鐘，誰方便呢？有興趣的朋友可以到我們的Youtube頻道「第一桶金」收看。

考慮2：生活配套是否齊備

最近熱賣的一些新發展區，例如洪水橋、錦上路等等，唔好話大型購物商場，乜都未發展，係咪值得高價搶購呢？

有人話依家冇，第時會起嘛？而且北部都會區喎﹗
但幾時起呢？10年？20年？
好似康城咁，第一批首都入伙都係乜都冇，要等到今時今日康城咁旺，足足等10幾廿年先有收成期，早買一批其實都要捱價。但人生有幾多個10年及20年呀？

考慮3：租金回報

當然有人話，而家嘅人買樓，重視環境嘛！其實住落就見真章。有網友早幾年買入掃管笏新盤上車，最初說喜歡那裡的環境，住了才一年，就決定將單位出租，自己租一個市區細單位住，因為頂唔順每日返工放工迫車，情願瞓多兩個鐘！

這種情況會反映在租金上，市區樓的樓價即使被新界樓追過，但租金卻遠比新界區高。論租金回報，市區樓絕對比新界樓吸引。